“एका छोट्याश्या दिवसभराच्या बैठकीत, जागेपणीचं मोठे स्वप्न , डॉ. संजीव सावजी , डॉ. नितीन बापट , अर्चना नरसापूर , प्रचिती अभ्यंकर, अरुण तोतला , श्रीकांत दरख , निवेदिता बापट आणि डॉ. मधुश्री सावजी यांनी बघितलं. आणि २००५ ला ओंकार बालवाडीच्या २२ पालकांच्या विश्वासावर , ओंकार विद्यालयाची सुरुवात झाली. पहिल्या तीन वर्षात मातृभाषेतील या विद्यालयाचे स्नेहसंमेलन हा वर्षभराचा अभ्यासक्रम झाला आणि त्याचे नामकरण " सप्तरंग सोहळा " झाले. हे आगळे वेगळे विद्यालय "मनोयोग पालक प्रबोधन" आणि " किल्ला बनवा स्पर्धेने" घराघरात पोहोचले. याचबरोबर कोजागिरी पौर्णिमेचे आयोजन करत पालक शाळेत पोहोचले. गीतापठण, चित्रकला आणि कराटे यातील विद्यार्थ्यांचे यश उत्साहवर्धक ठरले. सर मॅडम च्या ऐवजी ताई-दादा संबोधणाऱ्या , या छोट्या शाळेचे रूप पालटू लागले . छोटी विद्यालयाची जागा अपुरी पडू लागली . त्यामुळे स्वतःच्या विस्तीर्ण जागेचा शोध सुरू झाला . अश्याप्रकारे विद्यार्थी, शिक्षक , पालक आणि संचालक या सर्वांची शिक्षणाची आनंदयात्रा जोरात सुरू झाली.